Sedmog maja 2010. na parket pariske hale “Bersi” istrčale su ekipe 37-godišnjeg Ćavija Paskvala i tri godine starijeg Jevgenija Pašutina. Bilo je to evroligaško polufinale, tvrda utakmica s ogromnim ulogom u kojoj je prvi favorit završnog turnira Barselona dugo lomila, i na kraju konačno slomila otpor CSKA. Ostalo je istorija – katalonska mašina je u finalu samljela Olimpijakos, Paskval došao do svoje prve – i za sada jedine – evropske titule, dok su Pašutinovi momci uz mnogo muke u utješnoj utakmici za treće mjesto u produžetku savladali Partizan.

U sezoni 2011/12 Pašutin je sjedio na klupi evroligaša UNIKS-a i izgubio oba megdana s Paskvalovom Barselonom, a posebno bolan bio je poraz na domaćem terenu u Kazanju s 28 poena razlike.

Putevi dvojice trenera opet su se ukrstili ovog vikenda, ali sada su uloge bile zamijenjene. Pašutinovi “Lokosi” su na svom terenu isprašili goste iz Sankt Peterburga, nanijevši im prvi poraz u novoj sezoni. Pobjednička serija Paskvalovih pulena počela je 20. septembra kada su na evroligaškoj premijeri protiv Himkija slavili u Podmoskovlju, a trajala je tačno 84 dana.

Lider se u Krasnodaru solidno držao u prvih 20 minuta, na veliki odmor Lokomotiva je otišla sa šest poena prednosti, ali je nastavak utakmice u potpunosti pripao domaćinu. Peterburžani se početkom treće četvrtine nisu pošteno ni “opasuljili”, a “Željezničari” su za tili čas napravili seriju od 11-0!

Sve je de fakto riješeno krajem 25. minute kada je Džordan Kroford trojkom donio Krasnodarcima nedostižnih 20 poena prednosti, 60-40. Zenit se nije predao, u završnici trećeg kvartala je priprijetio i prišao na 9 poena zaostatka nakon što je Gudajtis pogodio oba penala, ali je Lokomotiva odbila nalet gostiju i u par navrata u posljednjoj četvrtini dolazila do maksimalnih +22. Kada je tri minute prije kraja Kuzminskas poentirao za 91-69, izgledalo je da će lider biti osramoćen u derbiju kola, međutim, njegovi strijelci su se pobrinuli da u finišu spuste razliku na nešto pristojnijih minus 15.

Pobjeda domaćina ima još veći značaj obzirom da je izborena bez najboljeg pojedinca, američkog centra Alana Vilijamsa, koji je krajem novembra pokidao ligamente koljena u okršaju s Jenisejom i teško da će se u ovoj sezoni vratiti na parket. 

„Lokosi“ su lidera tukli najjačim oružjem – nesebičnom kolektivnom igrom sa čak 26 asistencija. Strijelci domaćina su bili nadahnuti, a Peterburžani nisu znali od koga prijeti veća opasnost: najefikasniji pojedinac utakmice Kroford im je ubacio 23 poena, Kuzminskas dodao 20, skupio swdam skokova i podijelio tri asistencije za najveći indeks (25). Кevin Hervi upisao je dabl-dabl (12 poena, 10 skokova), Vil Kamings takođe bio dvocifren (11 poena), dok je Mantas Kalnietis majstorski proigravao drugove i završio derbi s čak 12 dodavanja. Posebna priča je Redži Linč, centar „Lokosa“ koji nakon povrede Vilijamsa nosi dodatni teret. Protiv Zenita je svih 16 poena ubacio iz igre uz visok procenat šuta (8-12, 67%), te dodao tri skoka, dvije asistencije, dvije ukradene lopte i čak šest blokada! U reketu je bio nepremostiva prepreka za košarkaše Zenita, a po broju „rampi“ izjednačio je ligaški rekord svih vremena koji je 4. oktobra u Moskvi postavio centar CSKA Džoel Bolomboj baš u duelu s Lokomotivom. 

U redovima gostiju vrijedna pomena je partija Arturasa Gudajtisa (18 poena, 9 skokova), dok su Kejsi Rivers i Ostin Holins postigli po 15 poena uz procente šuta niže od 50% (Rivers 6-13, Holins 5-12). Kevin Pangos je bio najbolji asistent Zenita sa sedam dodavanja, ali je istovremeno bio katastrofalan u šutu iz igre (1-9).

Sunce je, izgleda, konačno ogrijalo i navijače Avtodora – kluba koji je krajem devedesetih bio glavni takmac CSKA za titulu, a posljednjih godina nakon duže krize opet pokazuje znake života. Učestale promjene trenera u Saratovu su normalna pojava, ali Gordon Herbert ima šansu da se u gradu na obali Volge zadrži duže od mnogih prethodnika. Pod dirigentskom palicom kanadskog stručnjaka „Putari“ su u nedjelju došli do pete uzastopne pobjede, savladavši kod kuće fenjeraša Jenisej. Na spisku njihovih žrtava u novoj sezoni su i dosta bogatiji Himki i Lokomotiva, a lijepu šansu da dođu do šestog trijumfa imaće u narednom kolu kada u Saratov stiže Zjelona Gura.

U duelu s ekipom Dražena Anzulovića, Avtodor je vodio praktično tokom cijele utakmice, najveća prednost iznosila je 14 poena, ali su Sibirci u finišu prišli rivalu na samo pola koša – 74 sekunde prije kraja Hemonds je ubacio trojku, a na semaforu se upalilo 76-75. Nalet gostiju je ekspresno odbijen nakon tajmauta: Šakić je pogodio otvorenu trojku, Starks ukrao loptu rivalu, a najbolji pojedinac meča Mejson (21 poen, 8 asistencija, 4 skoka, indeks 24) polaganjem iz prodora zadao gostima završni udarac. 

U Kazanju UNIKS je prema očekivanjima lako savladao Kalev, prvenstveno zahvaljujući agresivnoj igri u odbrani. Gosti su samo u prvoj četvrtini prešli cifru od 20 poena, pa se u preostala tri kvartala uglavnom mučili u napadu. Bivši plejmejker Crvene zvezde Nejt Volters bio je najbolji strijelac (14) i asistent (6) u redovima pobjednika, dok je zvanje MVP utakmice pripalo organizatoru igre Kaleva Markusu Kinu (18 poena, 8 asistencija, 5 skokova, indeks 20).

U posljednjoj utakmici kola Zjelona Gura je na svom terenu deklasirala Astanu i prestigla na tabeli Himki, koji se spustio na devetu poziciju i trenutno je izvan plej-of zone. Poljaci su imali izvanredne procente šuta (65% za dva poena, 46% s distance), dominirali u skoku (37-27) i ukradenim loptama (14-6), a gostima ostaje za utjehu sjajno izdanje Džeremaje Hila koji je s 30 poena i identičnim indeksom bio najbolji pojedinac na terenu.

REZULTATI: UNIKS – Kalev 83-66, Avtodor – Jenisej 85-79, Lokomotiva Kubanj – Zenit 96-81, Zjelona Gura – Astana 110-86.

TABELA: Zenit 7-1, Nižnji Novgorod 4-1, CSKA 7-2, Avtodor 5-2, Lokomotiva Kubanj 7-3, UNIKS, Parma 4-3, Zjelona Gura 4-6, Himki 3-5, Astana 2-6, Kalev 1-5, Cmoki 1-6, Jenisej 1-7.

Photo: VTB