Sedma utakmica u Medison Skver Gardenu? Nije je bilo odavno. A bila bi prava poslastica.
Skoro prije tri decenije, proljeća 1994. godine Rajlijevi i Juingovi Niksi su imali dvije majstorice pred svojim navijačima. Prvo su pred svojom publikom sa 4:3 dobili Bulse, koji su tada igrali bez Džordana u polufinalu Istoka, a onda i Pejserse u finalu u sedmoj utakmici u Gardenu. A godinu nakon toga bili su tijesno poraženi u bolnoj sedmoj utakmici kod kuće od Pejsersa. Nakon ‘95 nije bilo sedmih plej-of utakmica u Gardenu, osim hokejaških.
Kad bi Niksi u petak pobijedili u Majamiju, narednog vikenda bi u Velikoj jabuci zavladala prava košarkaška groznica, a cijene ulaznica bi vjerovatno porušile sve rekorde jer su Rendžersi ispali iz NHL plej-ofa, Jenkiji igraju katastrofalno, pa su karte za Nikse trenutno najtraženija sportska roba.
Mnogi su Nikse otpisali nakon što je Majami dobio dvije uzastopne utakmice kod kuće i poveo sa 3:1 u seriji, ali njujorška ljevoruki trio predvođen Džejlenom Bransonom, koji je sinoć postigao 38 poena, imao i 9 skokova i 7 asistencija uz tek jednu izgubljenu loptu i odigrao bez odmora svih 48 minuta – nije položio oružje.
Beret sa 26 poena i Rendl sa 24 su mu dosta pomogli u napadu, a u odbrani je punom parom radio Kventin Grajms kojeg trener Tibodo takođe nije odmorio ni jedan jedini sekund, pa se serija nakon druge pobjede Niksa 112:103 opet seli u Majami. Niksi umalo nisu prosuli 19 poena prednosti iz treće četvrtine, ali sa ovako dobrim Bransonom jednostavno nisu mogli izgubiti.

Branson i Grajms se na pres konferenciji nisu žalili na umor, naprotiv, pozdravili su odluku svog trenera da ih ne vadi iz igre. Imanuel Kvikli se, to je sada izvjesno, neće oporaviti od povrede do petka, pa Branson i Grajms možda i ponove maksimalnu minutažu u šestoj utakmici u Majamiju.

Džejlen Branson i Kventin Grajms na pres konferenciji
Jedan od samozatajnih NBA skauta koji želi ostati anoniman, kojeg sam sinoć zapitkivao o svemu i svačemu, a koji ima višedecenijski staž u Gardenu, reče mi da nijedan igrač Niksa nije odavno odigrao ovako dobre plej-of serije kao Branson. I to ne od vremena Sprivela, Hjustona ili Juinga, nego još od Bernarda Kinga 1984. godine u serijama protiv Bostona i Detroita. To mi govori da nade za Nikse još ima.
Ali postoji i druga strana, Spolstrina. Za njega naš mladi reprezentativac Nikola Jović kaže da prije ovog plej-ofa nije mogao zamisliti da je ovako dobar trener.
Predviđa se da bi prosječna cijena jedne ulaznice, kad bi se desila sedma utakmica u Gardenu, bila barem 3 hiljade dolara. Ali Džimi Batler je tu da uštedi ogromnu lovu Njujorčanima koji bi rado da razbiju dječje kasice-prasice ili izvade pare sa oročenih računa ne bi li svjedočili sedmoj utakmici.

Džimi Batler (Majami)
Džimi reče da mu se ne vraća natrag u Njujork.
Photo: Privatni album twitter